April 5, 2011

அம்மம்மாவிற்கு ஓர் கடிதம்
2010 சித்திரை மாதம் 27 ந் திகதி சிவபதமடைந்த எங்கள் அருமை அம்மம்மாவின் இறுதி நிகழ்வின் போது பேரப்பிள்ளைகளால் எழுதி வாசிக்கப்பட்டது திரும்பவும் முதலாம் ஆண்டு நினைவாக……………

சிங்கப்பூர் மண்ணில் சிங்காரமாய் நீ பிறந்தாய்
சிரிப்பை தவிர வேறெதுவும் அறிந்ததில்லை
பள்ளிப்பருவத்தில் துள்ளித்திரியும் வேளையில்
பதிமூன்றாம்வயதில் பறிகொடுத்தாய் உன் அன்னையை
தன்னந்தனிப்பெண்ணாய் தவித்து நின்ற கொடுமை பார்த்து
தாய் நாடாம் தமிழ் ஈழத்திற்கு நின் தந்தை உன்னை அழைத்து வந்தார்

சங்கானை உன் தாய் மண்ணாம் அதனால்தான்
சங்குநிறம் உனக்கு அமைந்ததுவோ
வெள்ளைஉள்ளம் படைத்ததனால்
வெள்ளைத்தம்பியை நீ மணந்தாயோ
அதனால்தான்
வெள்ளைக்கோர் பிள்ளையையும்
தயாள குணத்திட்கோர் தம்பியையும்
கிள்ளை போல் ஒரு கிளியையும்
சிவப்பு நிறத்திற்கு ஓர் சிவகுமாரையும்
பறித்த புது மலரினைய சிறீதரையும்
வளவன் ஆண்ட வளலாயில் வளமுடனே
நீ பெற்றாய்

ஆத்தையையும், ஆச்சியையும் மட்டும் அறிந்திருந்த வேளையில்
அத்தையையும் ,மச்சியையும் அழகாக மொழிய வைத்தாய்
கிராமமே அறிந்த பலரை நகரத்தை அறிய வைத்தாய்
நகரத்துக் கல்லூரியில் நாம் படிக்க பரிந்துரைத்தாய்
Granny என்றென்னை அன்புடனே நீ அழைத்தாய்
ஆங்கில மொழி படிக்க அரிச்சுவடி நீ ஆனாய்
தனித்து நீ விமானத்தில் தயங்காமல் சென்று வந்தாய்
தையலையும் பின்னலையும் தனித்துவமாய் தெரிந்திருந்தாய்
singer தையல் மெசினை நீ கழட்டி சிறப்புடனே திரும்பப் பொருத்துவாய்

அதிர்ந்து நீ பேசியதை அணு அளவும் கண்டதில்லை
அயலவருடன் அன்பைத்தவிர வேறெதுவும் பகிர்ந்ததில்லை
பாசத்தை நின்னிடம் பலபேர் கற்க வேண்டும்
பண்பை நின்னிடம் பார்த்து பழகவேண்டும்
பொறுமைக்கு நீ ஒரு பூமித்தாய்
உன் இனத்தோருக்கு நீ ஒரு பூ அம்மா
உன் கண்ணில் நீர் வடிந்து அதிகம் நாம் பார்த்ததில்லை
சிலவேளை உன் நெஞ்சில் உதிரம் வடிவதை
என் உள் மனம் உணர்ந்ததுண்டு.

உன்தலைப்புச்சீலையில் தலை சாய்த்து நான் படுக்க,
சிரிக்கும் போது குலுங்கும் உன் வயிறதிர்வில்
குதித்து நான் எழுந்ததுண்டு.
உன் மடிச் சூடும், வயிறதிர்வும் இன்றும் நான் உணர்கிறேன்.

உன் முக அழகும் முடி அழகும் எனக்கு வரவில்லை
கழுத்திலுள்ள காய் மட்டும் கையிலே தடக்குகிறது.
சீனிப்போத்தலை குளிர் சாதனப்பெட்டியில் வைக்கிறேன்
பால் போத்தலையோ மைக்ரோ -ஓவனில் வைக்கிறேன்
மறதி வருத்தம் ஆரம்பமோ ????
உன் பிரிவை மறக்க ஓர் மறதி வருத்தம் வாராதோ???
சாந்தை
அம்மம்மா வீ டு(சாந்தை) செல்ல அப்படி ஓர் ஆனந்தம்
முத்தத்தில் ஓர் வாழை முதியோருக்கு உணவு படைக்க
மத்தியில் ஓர் மகிழ மரம் மனசெல்லாம் மணம் சேர்க்க
அதனுடன் மல்லிகையும், முல்லையும் தான் சேர்ந்து கொள்ள
அதனடியில் இளநீர்க்கோம்பையில் பதியம் வைத்த
செண்பகமும், ரோஜாவும்......
சுற்றிவர ரோஜாத் தோட்டம் பின் புறத்தில் மாஞசோலை
கிணத்தடியில் தென்னம் சோலை அதனருகில் வாழைத்தோட்டம்
அப்புச்சிக்கு பச்சடிக்கு பசுமையாக ஒரு தூதுவளை
அதனருகே கொடி எலும்பிச்சை முன் புறத்தில் மாதுளை
இதுதான் அப்புச்சியின் கை வண்ணத்தில்
உருவான சாந்தையின் விந்தை...

முழுகுவதற்கு கொடி எலும்பிச்சைக் காய் வாங்கி வர அம்மா
சொன்னதுமே அரை நொடியில் பறந்திடுவோம்
அறுவருமே அம்பு போலே, வரும்போது கொடி எலும்பிச்சை கையிலிருக்கிறதோ இல்லையோ மாங்காயும் மாதுளையும் வாயிலிருக்கும் அதனால் ……
அம்மம்மா வீ டு செல்ல அப்படி ஓர் ஆனந்தம்

என் குழந்தைகள் பிறந்த வேளை நீங்கள் செய்த உதவிகளை குழந்தைகளைப் பார்க்கும் போதெல்லாம் உணர்கிறேன்.

சித்ரா பௌர்ணமியில் சிவபதமடைந்த எங்கள் சிங்காரச்சிற்பமே
சத்தியமாக உங்களுக்கு சொர்க்கத்தில் ஓரிடம்தான்
அங்கு அப்புச்சியையும், அண்ணையையும் கேட்டதாகக் கூறுங்கள்.

பிள்ளையார் கோவிலில் நீங்கள் செய்யும் திருவிழாவும்,
மேளக்காரர்களுக்கு நீங்கள் செய்யும் சமையலும்,
அந்தப் பிள்ளையார் மோதகமும், சங்கானை இனிப்புப்புளியம் பழமும்,முற்றத்து செண்பக வாசமும், டொரியன் பழமும், மலிபன்பிஸ்கட்டுடன் நீங்கள் சாப்பிடும் வாழைப்பழமும்,
நீங்கள் கையால் பின்னிய மேசை விரிப்பும்,
பெரியறை நெல்லுப் பெட்டிக்குள் இருந்த பூட்டியின்
வாடமல்லி நிறத்திலிருந்த கூறைப்பட்டும், நாங்கள் போட்டு விளையாடிய உங்களது சற்றின் சாமொசுச் சட்டைகளும்
உங்கள் இனிமையான நினைவுகளை இறுதிவரை நினைவூட்டும்
இறுதி வணக்கம் அம்மம்மா
பின் குறிப்பு:
காகிதத்தில் எழுதினால் கண்ணீர் கரைத்துவிடும் என்று கணனியில் எழுதுகிறேன் அம்மம்மா.........

தகவல்
சாந்தினி ஏகாம்பரம்

சுவடுகள்